Mercedes-Benz E-Class - პოპულარული ბიზნეს-სედანი განახლდა

გერმანულმა პრემიუმკლასის ავტომობილების მწარმოებელმა კომპანიამ Mercedes-Benz მის სამოდელო გამაში ერთ-ერთი ყველაზე პოპულარული მოდელის, E-Class-ის ოჯახი განაახლა. კომპანიას ავტომობილის პრემიერა ჟენევის საავტომობილო შოუზე ჰქონდა დაგეგმილი, თუმცა მისი გადადების გამო პრემიერა ვირტუალურ რეჟიმში გაიმართა.

კომპანიამ წარმოადგინა როგორც სედანის, ასევე უნივერსალის ვარიანტები და AMG ხაზი.

მიუხედავად იმისა, რომ ავტომობილი შუალედურად განახლდა, წინამორბედისგან განახლებული მოდელის გარჩევა მარტივად არის შესაძლებელი, იმიტომ რომ ცვლილებები ვიზუალურ ნაწილშიც ბლომადაა. პირველ რიგში აღსანიშნავია განახლებული ფორმისა და შტრიხების მქონე წინა და უკანა სრულად დიოდის ოპტიკა. უკანა ფარები აქ დაგრძელებულია, რამაც ავტომატურად საბარგულის დასაკეცი ფორმის ცვლილებაც გამოიწვია, შეცვლილია უკანა ბამპერიც.

განსხვავებული დეტალები გამოჩნდება  All-Terrain ვარიანტში და AMG ვერსიაშიც. აქ მთავარი ცვლილება ბამპერებთან ერთად ცხაურაზეც მოდის. უნივერსალში კი დამატებით ქრომის დეტალები გაჩნდა.

გარდა ვიზუალური მხარისა, გამრავალფეროვნდა ფერთა გამაც და ინტერიერის ვარიანტებიც. ძარასთვის სამი დამატებითი ფერი გახდა ხელმისაწვდომი. ავტომობილმა ასევე მიიღო სრულიად ახალი მულტიმედია სისტემა MBUX, რომელსაც ახალი სანავიგაციო შესაძლებლობები და დამატებითი რეალობის ფუქნციაც აქვს. აქვეა ფუნქცია Energizing Coach რელაქსაციის რამდენიმე პროგრამით და სხვა ახალი ოპციები. სიახლეა მაგალითად: Urban Guard Protection და Urban Guard Protection Plus ოპციებიც, რომლებიც ავტომობილს ქურდობისგან იცავენ. ინტერიერში თვალში საცემია ახალი მრავალფუქნციური საჭე.

ძრავის ნაწილშიც სერიოზული ცვლილებებია, მოდელს ერთდროულად 7 ჰიბრიდული ვარიანტი გაუჩნდა ბენზინისა და დიზელის მოდიფიკაციებით, ამასთან, ოთხი მათგანი სრული ამძრაობის იქნება. რაც შეეხება წარმოდგენილ ყველაზე მძლავრ მოდელს, Mercedes-AMG E 53 4Matic+-ს, ის სამლიტრიანი ექვსიანითაა აღჭურვილი და 48 ვოლტიან ელექტროსისტემასთან ერთად ჯამში 435 ცხენის ძალას იძლევა. ამ მოდიფიკაციის ავტომობილი 0-დან 100-მდე 4,5 წამში ჩქარდება. უფრო მძლავრი ვარიანტების პრემიეეირა მოგვიანებით იგეგმება.

ევროპელ დილერებთან ახალი Mercedes-Benz E-Class ზაფხულში გამოჩნდება.