Volvo და Geely ერთ კომპანიად ჩამოყალიბდება

ჩინური Geely, რომელიც ფლობს შვედურ საავტომობილო კომპანიას Volvo, განიხილავს ორი კომპანიის სრულად შერწყმას და ამ გზით ერთიანი გლობალური მწარმოებლის შექმნას. კომპანიის განცხადებით, აღნიშნული ნაბიჯი შექმნის დამატებით კონკურენტულ შესაძლებლობებს და დააჩქარებს ფინანსურ და ტექნიკურ სინერგიას.

ცნობილია, რომ Geely Automobile Holdings Limited 2010 წლიდან გახლავთ შვედური Volvo-ს მფლობელი, რომელიც ჩინელებმა ამერიკული Ford-გან 1,8 მილიარდ დოლარად შეიძინეს. ბოლო მომენტამდე შვედები ერთგვარ დამოუკიდებლობას ინარჩუნებდნენ, თუმცა პერიოდულად უზიარებდნენ ტექნოლოგიას ჩინელების დაქვემდებარებაში მყოფ კომპანიას Lynk&Co და  თავად Geely-საც. გასულ წელს კომპანიებმა საკუთარი ძრავების განყოფილებები გააერთიანეს და ამ გზით შექმნეს ერთიანი ბიზნესერთეული. 

ახლა კი კომპანიები დაფიქრდნენ სრულმასშტაბიან შერწყმაზე, რომლის შედეგად იშვება ახალი გლობალური მწარმობელი. Geely-თან გაერთიანება კი  Volvo-ს საშუალებას მისცემს, კონკურენცია გაუწიოს  კონცერნ Volkswagen-ს, ასევე ახლად წარმოქმნილ FCA-PSA. გარდა ამისა, Volvo მიიღებს დამატებით წვდომას ჩინურ წარმოებაზე, ხოლო Geely-ს ევროპულ ბაზარზე ფეხის მოკიდებაში დაეხმარება.

ამ ეტაპზე შერწყმის თარიღი უცნობია, ამ დროისთვის მხარეებმა მხოლოდ სამუშაო ჯგუფები შექმნეს, რომლებიც მხარეებისთვის წინადადებებს ამუშავებენ და შემდეგ დირექტორთა საბჭოზე განსახილველად გაიტანენ.