Genesis-ის პირველი ქროსოვერი BMW X5 და Mercedes-Benz GLE-ს არ ჩამოუვარდება

კომპანია Genesis-მა ოფიციალურად წარმოადგინა მისი პირველი ქროსოვერი GV80. კომპანიამ ამ ეტაპზე ავტომობილის ფასი და სპეციფიკციები მხოლოდ სამხრეთ კორეისთვის გაავრცელა, თუმცა ის წლის ბოლომდე დანარჩენ მსოფლიოშიც ყველგან გახდება ხელმისაწვდომი.

Genesis GV80 ნოვატორული მოდელი აღმოჩნდა. პირველ რიგში ეს არის პირველი სამხრეთ-კორეული ავტომობილი, რომლისთვისაც ტოპმოდიფიკაციაში გათვალისწინებულია 22-იანი ბორბლები. მეორე, ქროსოვერმა მიიღო უჩვეულო უსაფრთხოების ბალიში: ის წინა სავარძლებს შორის იხსნება, რაც მძღოლსა და მგზავრს შორის დარტყმას უშლის ხელს, ჯამში მას 10 „ეარბაგი“ აქვს. მესამე, მოდელებზე დაინერგა სალონში  ხმაურის საიზოლაციო სისტემა  RANC (Road-noise Active Noise Control).

გაბარიტების მიხედვით, ის BMW X5 და Mercedes-Benz GLE-ის ზომისაა: სიგრძეში GV80 4945 მმ-ია, სიგანეში – 1975 მმ და სიმაღლეში – 1715მმ, ხოლო საბორბლე ბაზა 2955 მმ გახლავთ. ავტომობილის ძარა ფოლადისგანაა დამზადებული, კაპოტი და საბარგულის კარი კი ალუმინისგან.

სამხრეთ კორეაში GV80 უკანა ან ოპციონალურად სრული ამძრაობითაა ხელმისაწვდომი. სტანდარტულ მოდელს ზამბარის დაკიდების სისტემა აქვს, ხოლო ოპციის სახით ადაპტირებული ამორტიზატორით  არის ხელმისაწვდომი, რომელიც სიხისტეს საფარის მიხედვით იცვლის.

პირველ ეტაპზე ავტომობილი გამოვა უალტერნატივო სამლიტრიანი ტურბოდიზელით, რომელიც 278 ცხენის ძალას იძლევა და 588 მაბრუნი მომენტი აქვს. ის რვიან რობოტთანაა დაწყვილებული. 

მოგვიანებით კი გამოჩნდება 2,5 და 3,5 ლიტრიანი ბენზინის ძრავები, 300 და 380 ცხენის ძალებით. 

Genesis GV80-ის სალონში ნახავთ 12,3-დიუმიან ციფრული მართვის პანელს და 14,5 დიუმიან მულტიმედია დისპლეის. ასევე გათვალსიწინებულია პროექციული ეკრანი, სამზონიანი კლიმატ-კონტროლი, ადაპტირებული კრუიზკონტროლი, მძღოლის მდგომარეობაზე თვალთვალის სისტემა სალონში კამერით, ასევე ვენტილაცია და უკანა რიგის სავარძლების ელექტრორეგულატორები. სამხრეთ კორეაში მოდელი როგორც ხუთი, ასევე შვიდადგილიანი ვარიანტებითაა ხელმისაწვდომი, მათზე ფასი კი 57-60 ათასი დოლარიდან იწყება.