ყველაზე მძლავრი BMW 7 series იქნება ელექტრო i7

კომპანია BMW-ს ხელმძღვანელმა, ოლივერ ციპსემ ახალი თაობის BMW 7 series შესახებ გარკვეულ სიახლეებზე ისაუბრა. მისი თქმით, საფლაგმანო სედანი წარმოდგენილი იქნება ოთხ ვარიანტად: ბენზინის, დიზელის, ჰიბრიდული და სრულიად ელექტრო. ეს უკანასკნელი კი მისი თქმით, ყველაზე მძლავრი იქნება.

„შვიდიანის“ ტოპვარიანტი ბაზარზე გამოვა ინდექსით i7 – და სწორედ ის ჩაანაცვლებს ამჟამინდელ M760i-ს. მოსალოდნელია, რომ სედანი აღიჭურვება 120 კვს სიმძლავრის ელემენტებით, ერთჯერადი დამუხტვით ის 700 კმ მანძილის გავლას შეძლებს, თუმცა კლიენტებს ასევე შესთავაზებენ უფრო სუსტ 80 კვს სიმძლავრის ვარიანტსაც, შესაბამისად, ნაკლები სავალი მარაგით. კომპანია უკვე შეუდგა i7-ის საგზაო ტესტირებას.

ამ დროისთვის კომპანიის სამოდელო გამაში ყველაზე მძლავრ ვარიანტად ითვლება BMW M760i, რომელიც დაკომპლექტებულია 585 ცხენისძალიანი 6,6 ლიტრიანი V12 ძრავით. ის ნულიდან 100-მდე 3,6 წამში ჩქარდება, ხოლო მისი მაქსიმალური სიჩქარე 250 კმ/სთ-ია.

ელექტროსაფლაგმანო სედანის გამოჩენა ბაზარზე 2021 წლის ბოლოს ან 2022 წლის დასაწყისში იგეგმება.