Bugatti Chiron -ის წარმოება 2021 წლის ბოლომდე მოხდება

კომპანიამ Bugatti გაავრცელა ინფორმაცია მოდელ Chiron-ის წარმოებასთან დაკავშირებით. როგორც ირკვევა, ეს მოდელი ამ დრომდე ხელმისაწვდომია და მის წარმოებას კომპანია 2021 წლის ბოლომდე გეგმავს. ამ დროისთვის კომპანია აპირებს ჯამში 500 მოდელის წარმოებას, მათგან 100-ზე კომპანია ჯერ შეკვეთას ელოდება. პლუს ამას, კომპანია გეგმავს, უკვე 2021 წელს სპეცმოდელის, Chiron Super Sport 300+-ის წარმოებასაც.

Chiron ბაზარზე 2017 წელს გამოჩნდა, მის სადებიუტო წელს კომპანიამ 70 ავტომობილი აწარმოა, 2018 წელს – 76, ხოლო 2019 წელს – 80 ერთეული. Chiron-ის მეორასე მოდელი კომპანიის 110 წლის იუბილეს მიეძღვნა - 110 ans Bugatti - მის გაფორმებაში საფრანგეთის დროშის ელემენტებია დატანილი, ასევე გამორჩეულია უკვე საბაზისო ვარიანტში პანორამული სახურავით. ეს სპეცვერსია მხოლოდ 20 ეგზემპლარად გამოვა და ყველა მათგანზე შეკვეთა უკვე მიღებულია.

რაც შეეხება Bugatti Chiron Super Sport 300+-ს, რომელიც 30 ეგზემპლარად გამოვა, ის 8,0 ლიტრიანი  W16  ძრავითაა აღჭურვილი და 1578 ცხენის ძალა აქვს. მას შეუძლია 490 კმ/სთ სიჩქარის განვითარება. ეს მოდელი 3,5 მილიონი ევრო ღირს.

როგორც ცნობილია, კომპანიამ 2020 წელი „ბუგატის წლად“ გამოაცხადა და ერთგვარი ტიზერი გვიჩვენა. ერთ-ერთი ვერსიით, საუბარია სერიული წარმოების La Voiture Noire, ულტრამდიდრულ ავტომობილზე, რომლის კონცეპტი 11 მილიონ ევროდ გაიყიდა.